Металург се засили со репрезентативец на БиХ кого Вардар го памети по – лошо!

Станува збор за ракометар со големо искуство, кој зад себе има настапи за екипи како ППД Загреб и Висла Плоцк во Лигата на шампионите. Тој во Автокоманда доаѓа од таборот на Чурго, каде што минатата сезона играше заедно со поранешниот вардарец Алем Тоскиќ. Тарабокија им е добро познат на вардарци, со оглед што постигна гол со звукот за сирената за изедначување (30-30) во мечот на полскиот тим против црвено-црните во 2016 година, кога имаше учинок шест од шест од поле.

Тарабокија е петтиот ракометар со кој се засили Металург за претстојната сезона, по Златко Хорват, Бранко Канкараш, Момир Рниќ и Никола Потиќ. „Металурзите“ претходно ангажираа среден бек, Бразилецот Енрике Тешеира, но тој набрзо потоа се премисли и остана во романскиот тим ЧСМ Букурешт.