Јовиќ ќе го води Еурофарм Пелистер 2 и следната сезона

Александар Јовиќ го продолжи договорот со Еурофарм Пелистер 2 на уште една сезона. Стратегот ќе го води тимот и следната натпреварувачка сезона 2021/2022. 

Раководството на битолскиот тим е исклучително задоволно од работата на Јовиќ во втората екипа. Впрочем под негово водство тимот играше одлично во првиот дел од сезоната и сега ќе разигрува во плеј-офот. Двајца млади играчи од неговиот ростер Цветан Кузманоски и Дарио Петровски се изборија за договор во првиот тим на Пелистер.

Успешната сезона и остварувањето на целта не остана не забележана од управата на Еурофарм Пелистер 2. Непосредно пред почетокот на плеј-офот, битолскиот клуб и тренерот Александар Јовиќ договорија продолжување на соработката.

„Сакам да изразам благодарност до претседателот Зоран Стерјев и целокупната управа на ракометното семејство Еурофарм Пелистер за укажаната доверба и за продолжувањето на соработката“, изјави Јовиќ. „Голема благодарност што управата ни овозможи одличен тренерски тим. Тука мислам на Александар Зарков како мој прв соработник, Зоран Атанасовски, кондицискиот тренер Александар Марковски, физиотерапевтот Јован Боглев и Златко Вељановски како логистика. Имаме одличен тим и во следната сезона ќе ја оправдаме довербата и ќе работиме за добробитот на битолскиот и македонскииот ракомет“, заврши поранешниот македонски репрезентативец.