Вработена во Челси ќе заглави 10 години затвор зашто украла неделна плата на Фофана!

29 ноември 2025 - 10:38

Поранешна долгодишна административна службеничка во фудбалскиот клуб Челси признала вина за измама во вредност од повеќе од 200.000 фунти (околу 230.000 евра), извршена во период од четири години.

Станува збор за Клер Волш (39), која повеќе од две децении работела како помошник-благајник и која ја злоупотребила својата службена позиција за лична корист. Таа се соочува со затворска казна до 10 години, за кражбата која изнесува колку неделната плата на Весли Фофана.

Волш се појави пред Прекршочниот суд во Вестминстер, каде што се изјасни виновна за измама извршена помеѓу јуни 2019 и октомври 2023 година. Судот оцени дека обемот на измамата ги надминува неговите ингеренции, поради што случајот ќе продолжи на Крунскиот суд во Ајлворт, каде што ќе биде изречена конечната пресуда.

Финансиските неправилности биле откриени од страна на клубот на почетокот на 2022 година, по што Челси веднаш го пријавил случајот во полиција.