Се пензионира еден од најголемите УФЦ борци на денешницата - со пораз!

20 јули 2025 - 09:55

Еден од најпопуларните УФЦ-борци на денешницата, Американецот Дастин Порие, за последен пат излезе од октагонот, синоќа во Њу Орлеанс, ставајќи крај на 16-годишна кариера во ММА.

На разочарување на публиката во неговата родна Луизијана, се прости со пораз од Макс Холовеј, во борба до 70 килограми (лесна категорија), која како влог го имаше ревијалниот БМФ-појас.

Холовеј победи со едногласна судиска одлука, со резултат 48-47, 49-46, 49-46 откако и двајцата забележаа по еден нок-даун, но тој беше поактивен и попрецизен низ петте рунди. За „гордоста на Хаваи“ ова беше 27. победа во кариерата со 35 борби, додека 36-годишниот Порие ракавиците ги спушти со конечен скор од 30 победи и 10 порази во 41 ММА-борба (една без победник). 

Од нив 32 беа во УФЦ (22-9-1), почнувајќи од 2011 година до денеска, период во кој еднаш стана привремен шампион во лесна категорија (2019 година), совладувајќи го токму Макс Холовеј за појасот. Потоа се бореше и за апсолутната титула, во септември 2019, но загуби од Хабиб Нурмагомедов. 

Важен белег во кариерата му остави и трилогијата против Конор Мекгрегор, која почна со победа на Ирецот, со нокаут, во 2014 година, за Порие да ја добие својата одмазда во 2021 година и тоа со две победи.