Пресуди лошиот скок: Кадетите со пораз го почнаа второлигашкото ЕП во Сараево!

Жолто-црвените достојно му се спротивставија на реномираниот противник, кој дури во финишот го скрши отпорот за нашите момчиња. Почетокот ѝ припадна на руската селекција (23-13), но потоа следеа блескави десет минути на македонските кошаркари на возраст до 16 години, кои вториот период го добија со 23-10 за водство на крајот од првото полувреме (36-33).

Клучно за поразот беше лошата игра во третата четвртина, во која тешко постигнувавме кош, а ѝ дозволувавме на Русија лесни поени за целосен пресврт и двоцифрена позитива на противникот пред решавачките минути (43-54). Избраниците на селекторот Александар Јованчев не се предадоа дури и во овие моменти, со голема упорност и борбеност дојдоа на сао еден поен негатива (69-70) во последната минута, но немаа сила за целосен пресврт.

Главна причина за неуспехот е огромната доминација на противникот под кошевите, каде што имаше дури 22 скока повеќе (33-55). Марко Миловановиќ со 20 поени и десет скока беше најдобар кај Македонија, Гоце Петрушевски постигна 12 поени додека Марко Величковски реализира 10 поени.

Наш следен противник, утре, е селекцијата на Белгија (14.45 часот).