Макбаскетот доби нова ѕвезда: Димитријевиќ првпат е кошаркар на годината (ФОТО)
Со ова, 21-годишниот кошаркар влезе меѓу најголемите великани на макбаскетот како Петар Наумоски, Врбица Стефанов, Перо Антиќ, Тодор Гечевски, Ѓорѓи Чековски, браќата Стојановски..., најавувајќи нова ера, која претходно денеска ја најави и новиот селектор на националниот тим, Александар Тодоров.
Убедливо најмногу награди доби актуелниот шампион МЗТ Скопје, кој „собра“ дури четири признанија. Две беа освоени како најдобри екипи во сениорска и младинска конкуренција, како и за најдобар тренер кај сениорите, Ѓорѓи Кочов и во машка младинска конкуренција, Горан Крстевски.
Посебно признание доби Емил Рајковиќ, творецот на казахстанското кошаркарско чудо Астана, кој пред извесно време стана и селектор на репрезентацијата на оваа земја. Екипата на ЖКК Вардар е најдобра во женска конкуренција, каде што најдобар тренер е Жаклина Стојановска, а најдобра кошаркарка Александра Стојановска, која игра во Албанија.
Постхумно признание доби прерано починатиот делегат и поранешен судијаИгор Стојанов за особен придонес во кошарката, а свое место меѓу наградените добија и припадниците на Специјалната олимпијада. Челниците на КФСМ доделија и плакети на своите спонзори, кои ги помагаа финансиски и логистички во изминатата 2019 година.
ЛИСТА НА НАЈДОБРИТЕ ЗА 2019 ГОДИНА
Најдобар кошаркар: Ненад Димитријевиќ (Шпанија).
Најдобра кошаркарка: Александра Стојановска (Албанија).
Најдобар тренер во странство: Емил Рајковиќ.
Најдобар тренер во машка конкуренција: Ѓорѓи Кочов.
Најдобар тренер во женска конкуренција: Жаклина Стојановска.
Најдобра машка екипа: МЗТ Скопје.
Најдобра женска екипа: ЖКК Вардар.
Најдобар судија: Александар Милојевиќ.
Најдобра младинска репрезентација: Машка кадетска репрезентација.
Најдобар млад кошаркар: Андреј Јакимовски (Италија)
Најдобра млада кошаркарка: Илина Селцова (Унгарија).
Најдобар тренер во машки младински категории: Горан Крстевски (МЗТ Скопје).
Најдобар тренер во женски младински категории: Владимир Ѓоровиќ (Струга 2009).
Најдобра машка младинска екипа: МЗТ Скопје.
Најдобра женска младинска екипа: Бадел 1862.