Лазар Лечиќ: Американците ни ја украдоа државата и ни ја уништија кошарката!
Легендарниот тренер на Работнички, кој подоцна во кариерата работеше и во МЗТ Скопје, во интервју за српскиот „Курир“ се потсетува за најинтересните моменти од својата кариера, пред се за анегдотите по кои најмногу и го паметат вљубениците во кошарката. Но, покрај тоа, неговото име е запишано и во аналите на овој спорт на просторот на поранешна СФР Југославија, како трет најуспешен тренер зад Мирко Новосел и Ранко Жеравица и како творец на тимот од „Градски парк“, кој во тоа беше беше тврд орев дури и за најдобрите тимови во некогашната заедничка држава.
„Во периодот помеѓу 1965 и 1980 година, Југославија доминираше. Кај нас се играше најдобрата кошарка во светот и тоа поради фактот што беше предводена од вистински професионалци и иноватори. Да не нѐ растуреа Американците, а со тоа и да не ни ја растуреа кошарката и денес ќе беше исто вака“, вели Лечиќ.
Прва работа на која помислува кога се споменува кошарка е - љубов и желбата да го искористи своето знаење стекнато во Белград за развој на овој спорт и во Македонија.
„Најголемите кошаркарски знаења ги стекнав во Белград работејќи со легедарниот професор Александар Николиќ. Потоа се вратив во Скопје и почнав да работам со јуниори и продолжив до самиот крај. Изведов на пат неколку генерации на Работнички, па потоа почнав да шетам и да работам во Чачак, Љубљана, Нови Сад, Солун...“, објаснува популарниот „Грк“.
Во поранешна СФРЈ тој беше познат како специјалист за наоѓање и работа со плејмејкери.
„Луѓето од југот се ниски и тешко беше во тоа време да се најде висок човек во Македонија. Дали беа вкупно десетина, поради што морав да се концентрирам и играта да ја фокусирам на бековите, кои беа брзи како струја. Користејќи ги нивните карактеристики прво почнавме да играме зонски пресинг, нешто што го видов од хокеарите и што успеав да го прилагодам на законитостите на кошарката. А, дека успеав во тоа покажува и фактот што Работнички во тоа време беше екипа со најголем број украдени топки“, дополнува Лечиќ.
Еден од најголемите успеси во неговата кариера е златниот медал со Југославија од Светското првенство (СП) во 1970 година во Љубљана како помошник на тогашниот селектор Ранко Жеравица. За ова пред исвесно време беше снимен и филм кој беше исклучително популарен, во кој Лечиќ беше глумен од актерот Сашко Коцев.
„Филмот е убав, иако е претставен како приказна за односот на Партизан и на Црвена Звезда поради што се лутат Хрватите. Мене ме игра Коцев и не сум задоволен од начинот на кој ме претставува. Не ме контактира за време на снимањето, а можев многу да му помогнам бидејќи имав податоци кои можеа да му помогнат“, искрен е како и секогаш легендарниот стратег.
Внукот на легендарниот тренер, Андреј Апостолски Лечиќ веќе тргна по неговите патеки, студирајќи ја кошаркарската игра и физичката подготовка, а истовремено работејќи како тренер во подмладокот на Работнички.
Повеќе за ова и за голем број интересни анегдоти поврзани со легендата прочитајте на следниот линк.