Копи-пејст: Кошаркарите ги добија истите ривали од пред четири години!

28 април 2021 - 16:56

Македонската репрезентација против добро познати противници ќе ја почне кошаркарската ренесанса чија цел има обезбедување пласман на Светското првенство (СП) 2023, откако на денешната ждрепка ги доби Швајцарија и Словачка во претквалификациите за следниот Мундобаскет.

Ова е идентична група од првата фаза од претквалификациите за ЕП 2022, кои ги завршивме како првопласирани со три победи и еден пораз. Швајцарците и овој пат ќе ни бидат најголем ривал за првото место, пред сѐ поради поразот што ни го нанесоа во јуни 2018 година, но и поради шокантната победа над големата Србија (92-90) во квалификациите за следниот континентален собир.

Доброто е што пласман во квалификациите за СП 2023 обезбедуваат двете најдобри селекции, поради што е дозволен и мал кикс за четата предводена од новиот селектор Драган Бајиќ. Реално е да се очекува дека последни би биле Словаците, кои двапати ги победивме во претходниот циклус и тоа со 87-74 на домашен терен, односно 74-66 на теренот на противникот.

ПРЕТКВАЛИФИКАЦИИ ЗА СП 2023

ГРУПА Д: Шведска, Португалија, Австрија

ГРУПА Е: Романија, Летонија, Белорусија

ГРУПА И: Црна Гора, Данска, Исланд

ГРУПА Ф: Македонија, Швајцарија, Словачка