Симултанка на Вудард: Десеткуваниот МЗТ Скопје искусно го освои Сараево! (ФОТО)
„Металците“ иако настапија десеткувани, без дури тројца македонски репезентативци и тоа повредените Љубомир Младеновски, Марко Симоновски и Дарко Соколов, одиграа квалитетно и сосема заслужено дојдоа до посакуваните бодови. Избраниците на тренерот Ѓорѓи Кочов доминираа во текот на сите 40 минути, а најдобар показател за тоа е фактот што домаќинот само во два наврати дојде до егал-ситуација, а ниту еднаш не беше во водство.
Како клучна за триумфот се покажа серијата 11-2 во финишот од третата и на почетокот од последната четвртина, со која беше вратено највисокото водство од девет поени (63-54). Тоа ја врати самодовербата кај кошаркарите на МЗТ Скопје по налетот на екипата од Сараево, кои потоа умешно го приведоа натпреварот кон „мирните води“. Домаќинот на крајот дојде и на само минус еден (71-72), но гостите подобро се снајдоа во пенал-завршницата.
Американецот Џејмс Вудард го одигра сигурно најдобриот меч откако е дојден во македонскиот тим и со 24 поени, пет скока и четири украдени топки беше најдобар во составот од Аеродром. Фантастичен беше и хрватскиот интернационалец Иве Иванов, кој средбата ја заврши со 19 поени и шест скока. Лестер Медфорд имаше учинок од 10 поени и по шест скокови и асистенции.
Македонскиот претставник во АБА2 сега има учинок 8-3 и е осамен на второто место на табелата, зад засега неприкосновената Приморска која има скор 11-0. Следниот меч за МЗТ Скопје е веќе во вторник, кога ќе му гостуваат на словенечкиот тим Хелиос.