МЗТ Скопје и Работнички ќе почекаат на стартот на АБА2 и тоа дури до - октомври!

Според новите насоки, донесени на денешното Собрание на АБА, второлигашката јадранска лига ќе почне на 1 октомври, додека членовите на елитата првите средби ќе ги одиграат два дена подоцна. Ова воедно значи двонеделно пролонгирање на првичните замисли, кое може да биде и зголемено ако не се намали бројот на заболени со Ковид-19 на просторот на поранешна СФР Југославија. Најголем проблем за екипите се патувањата, особено што две од земјите кои имаат учеснички се членки на Европската унија (Словенија и Хрватска), каде што важат поригорозни правила за патувања во однос на останатите држави (БиХ, Црна Гора, Србија и Македонија).

На состанокот беше разгледан и усвоен Здравствениот протокол за Ковид-19, од кој најмногу се дискутираше за делот за задолжително тестирање на сите во екипите пред секој натпревар, што носи дополнителен финансиски трошок до 50.000 евра, во зависност од државата. Дури и богати екипи како Цедевита Олимпија се побунија на овој дел, односно побараа лигата да најде начин да го олесни овој сегмент на клубовите со наоѓање спонзор и партиципирање во трошоците.

Истовремено, напоменато е дека челниците на АБА разгледуваат и други модели за одигрување или, пак, доигрување на сезоната во случај на прекин поради пандемијата, меѓу што најреална варијанта е играње според турнирски модел.