Изненадување во Бар: Морнар му покажа на МЗТ Скопје како да го победи Партизан!

20 септември 2017 - 23:21

Кошаркарите на Морнар го направија најголемото изненадување во четвртфиналната фаза од Суперкупот на АБА, откако во вечерашниот последен дуел со совладаа белградски Партизан со 91-77.

Домаќинот на првото издание на Суперкупот одигра фантастичен меч и во второто полувреме целосно го скрши отпорот на фаворизираните црно-бели. Истовремено, тие на македонскиот шампион МЗТ Скопје му го открија патот кон успехот против поранешниот европски шампион, кој е нивни прв противник на стартот од новата сезона во АБА-лигата (29 септември).

Овој меч долго ќе го памети и македонскиот судија Боро Антовски, кој дебитираше на меч од регионалното натпреварување. Екипата од Бар до триумфот дојде без помошта на поранешниот кошаркар на МЗТ Скопје, Куманово и на Кожув, Урош Луковиќ, кој воопшто не влезе во игра против тимот каде што настапуваше минатата сезона.

Победата на Морнар, пак, значеше црногорско полуфинале во Суперкупот и тоа против Будуќност, кој претходно беше подобар во пресметката со Цибона (96-90). Меѓу четирите најдобри се најдоа уште и Цедевита и Мега Бемикс, кои беа подобри од ФМП (86-68) односно од Игокеа (83-72). овие средби се играат задутре, а големото финале е в сабота.