Богдановиќ со осум тројки сам го победи тимот на Мајкл Џордан (ВИДЕО)

11 април 2021 - 21:43

Српскиот кошаркарски репрезентативец, Богдан Богдановиќ, вечерва го сруши личниот рекорд на постигнати тројки, откако погоди осум далекуметни проектили во вечерашниот триумф на неговата Атланта хокс кај Шарлот хорнетс (105-101).

Поранешниот соиграч на нашиот Перо Антиќ во Фенербахче средбата ја заврши со 32 поени (8/15 за 3п, 1/6 за 2п, 6/7 за 1п) и буквално сам успеа да го совлада составот чиј мнозински газда е легендарниот Мајкл Џордан. Причина за тоа е што „јастребите“ вечерва настапија десеткувани, без Јанг, Јалинари, Редиш, Хантер и Колинс, но предводени од Србинот одиграа одличен натпрвар.

Богдановиќ покрај осумте тројки ги постигна и двете клучни слободни фрлања на шест секунди до крајот, со кои стави крај на надежите на „стршените“ за некаков пресврт.