Ова го нема ниту во НБА: МЗТ и Блоко за 30 дена би можеле да одиграат вкупно 25 меча

Сино-белите од Аеродром од утре, кога на домашен терен ќе го пречекаат Спарс (17 часот), сѐ до средината на април за кога е закажана куп-пресметката, максимално би можеле да одиграат неверојатни 15 натпревари. Од тоа, девет би биле во плејофот од АБА2-лигата и тоа на 20, 24 и 27 март (полуфинале) односно 1,2,4,5 и 8 април (финале), секако ако се играат максимален број средби во двете серии и ако македонскиот тим ја мине првата плејоф-пречка. До крајот на Првата лига, пак, избраниците на тренерот Ѓорѓи Кочов имаат уште четири меча за одигрување (Кожув, Куманово, Пелистер и Фени), а ќе имаат и две обврски во Суперлигата.

Гевгеличани, пак, до почетокот на Купот, чии ко-домаќини се со тимот на Кожув, се соочуваат со сигурни десет меча и тоа на домашна и балканска сцена. Исто како и МЗТ Скопје, кошаркарите на Блокотехна до средината на следниот месец ќе мора да одработат шест пресметки од македонскиот шампионат и тоа четири од Првата лига (Гостивар, АВ Охрид, Работнички и Кожув) и две од Суперлигата. Избраниците на тренерот Марјан Илиевски ќе одиграат и четири средби во БИБЛ-лигата и тоа уште две од регуларниот дел од сезоната (денеска против Башкими и за една недела против Берое) како и уште две на фајналфор-турнирот во Тирана (6 и 7 април). На оваа завршница ќе учествуваат уште албанска Теута и бугарските екипи Академик Бултекс и Берое, а секоја екипа ќе игра во полуфиналето и потоа во финалето или дуелот за 3. место.

Ова дефинитивно ќе биде пеколен ритам за двете екипи, каков што тешко може да се види дури и во НБА-лигата, но и шанса кошаркарите и на МЗТ и на Блокотехна да покажат дека со право се меѓу најдобрите во државата. Аеродромци во моментов се првопласирани со скор 14-2 додека тимот од Гевгелија е на второто место со учинок 13-3. Веднаш за овој двоец е Работнички, кој има 13 победи и два порази, како и еден меч помалку од овие два тима.