МЗТ со „стотка“ ја прегази Струмица за четири од пет во Првата лига!

15 ноември 2022 - 19:53

Кошаркарите на МЗТ Скопје немаа никакви проблеми во последниот меч од 5. коло од Првата лига, откако лесно и убедливо ја преслушаа екипата на Струмица (102-66).

Ова беше четврта победа во петтиот прволигашки натпревар за актуелниот првак сезонава, која доаѓа како своевидно загревање за петочното гостување од АБА-лигата. Разликата во квалитет помеѓу двата тима беше огромна, па единствена енигма беше конечната разлика.

Адем Мекиќ со 16 поени, четири скока и пет асистенции и Димитар Пандев со 15 поени и 11 скока беа најпрецизни кај аеродромци, додека зад нив беа Страхиња Миќовиќ и Дамјан Робев со по 12 поени и Дамјан Стојановски со 11 поени. Стефан Крстајиќ со 20 поени беше најефикасен кај гостите.

МЗТ Скопје в петок ќе му гостуваат на белградски ФМП, додека обврската од шестото прволигашко коло ќе ја одработи следниот вторник, на домашен терен против Куманово.