МЗТ Скопје го реши тренерското прашање за следната сезона

15 јули 2019 - 12:10

Предводниците на актуелниот македонски кошаркарски шампион МЗТ Скопје денеска го потврдија останувањето на Ѓорѓи Кочов (34 години) на клупата на овој тим и за следната сезона, потенцирајќи дека тоа е дополнителна потврда на нивните заложби за „давање шанса на младите домашни тренери, кои, пак, во иднина би биле столб и на македонската кошарка во целост“.

Станува збор за шестиот стратег кој успеал да го донесе шампионскиот пехар во „Јане Сандански“ (по Тодоров, Пипан, Мартич, Јончевски и Назор) и само четвртиот тренер во Македонија (по Давитков, Рајковиќ и Јончевски) кој може да се пофали со триумф во домашното првенство и како играч и како предводник од клупата. Тој во „сино-белиот“ табор дојде во текот на предминатиот шампионат, а за него ова ќе биде втора сезона која ја почнува како предводник на МЗТ Скопје.

„Останување на Кочов воедно е и потврда на заложбата на нашиот клуб за продолжување на стратегијата за форсирање на млади македонски кошаркари, кои и во следниот период ќе добијат шанса за промоција и за напредување“, се вели во соопштението од таборот на аеродромци.

Предводникот на „металците“ веќе работи на формирање на тимот за следната сезона, во која тимот од Аеродром повторно ќе биде дел и од АБА2-лигата.