Изненадување во дербито: Гостивар му го нанесе третиот пораз на Работнички!
Гостиварци, кои станаа третиот тим кој сезонава го совладал шампионот (заедно со Блоко и МЗТ), одиграа фантастичен меч дури и без повредениот Бојан Трајковски, користејќи го преголемиот број загубени топки на противникот (вкупно 19), а максимално искористувајќи го феноменалниот шут за два поени во кој погодуваа со неверојатна 73-отстотна прецизност (22/30). Домашните клучната предност ја остварија во финишот од првата и почетокот од втората четвртина, кога со серија 16-3 дојдоа до двоцифрена позитива (27-17), која им даде поголема слобода во играта.
Центарци во третиот период успеаја да се вратат во игра, дури и изедначија во неколку наврати, но кошаркарите на Гостивар овој дел од играта го завршија со нова серија 10-0 за повторно двоцифрено одлепување, кое овој пат беше клучно за освојување на драгоцените бодови.
Тенксли Ефианаи со 22 поени беше најефикасен во победничкиот тим, во кој Џозеф Фустингер постигна 17, а Ренато Димитриевски 10 поени, додека Чавдар Костов со 16 поени беше најпрецизен кај Работнички.
Гостивар сега има скор 17-6 и остана пред Блокотехна (16-7) во битката за третото место на табелата. Центарци, пак, сега имаат ист број порази како МЗТ Скопје (по три) во борбата за позицијата број еден пред плејофот.