И Медфорд си замина: МЗТ Скопје со нови странци ќе ја брани титулата!

23 јули 2019 - 15:36

Екипата на МЗТ Скопје со нови странски засилување ќе се обиде да ја одбрани титулата во новата сезона, откако нова средина си пронајде и единствениот кој имаше двегодишен договор со шампионот, Лестер Медфорд.

Американецот, кој претходно договорно стави крај на соработката со шампионот и тоа на обострано задоволство, сезоната ќе ја продолжи во Летонија и тоа во дресот на ВЕФ Рига каде што денеска и официјално беше претставен. Медфорд добро ја почна минатата сезона, но нагло попушти во клучните средби во кои одигра под очекувањата. Во АБА2-лигата на 21 средба просечно реализираше 12,3 поени, 6,8 асистенции и 4,6 скока додека во домашното првенство на 29 одиграни натпревари имаше просек од 8,8 поени, 3,6 асистенции и 2,5 скокови.

Претходно, Џејмс Вудард замина во германскиот тим Бајројт, Андрија Бојиќ потпиша за романски Волунтари, а Иве Иванов се врати во матичниот Задар.