Фантастична последна четвртина: „Соколите“ со голем пресврт го прелетаа Куманово!

21 октомври 2017 - 21:07

Кошаркарите на Карпош Соколи дојдоа до третата победа по ред во Првата лига сезонава, откако вечерва, со фантастичен пресврт во последната четвртина, како гости го совладаа Куманово со 94-83.

Домаќинот во последните 10 минути влезе со предност од девет поени (62-71), но тогаш проработе нападот на „соколите“, кои четвртиот период го добија со неверојатни 32-12, што на крајот им донесе и убедлив триумф.

Дарко Соколов со 22 поени, шест скока и седум асистенции беше најдобар кај гостите, Ненад Делиќ додаде 20 поени додека Тадеус Мекфејден средбата ја заврши со 12 поени и девет скока. Немања Милковиќ со 19 и Димитар Караџовски со 18 поени беа најефикасни кај кумановци.

Со оваа победа, карпошани се изедначија со Блокотехна на врвот од прволигашката табела со скор 3-0.