Амбициозниот Гостивар потклекна: Одличниот Мекиќ му донесе два од два на Куманово!

14 октомври 2018 - 19:42

Екипата на Куманово дојде до втората по ред победа во новата сезона во Првата лига, откако вечерва, во дербито на колото, без поголеми проблеми го совлада амбициозниот Гостивар со 75-63 (17-16, 18-11, 21-21, 19-15).

Најзаслужен за триумфот на кумановци беше репрезентативецот Адем Мекиќ, кој средбата ја заврши со 26 поени и осум скока. Домаќинот воедно шутираше далеку подобро, а имаше и двоцифрен број повеќе скокови од незгодниот ривал (46-31). Одличен кај кумановци беше и Мирко Ковач со 13 поени и шест скока. Фурстингер и Сегариќ со 19 односно 13 поени беа најпрецизни кај Гостивар.

Вчера се одиграа останатите средби од 2. коло во кои Работнички и МЗТ Скопје ги „згазија“ Пелистер односно Шкупи, Кожув беше подобар од АВ Охрид, а Блокотехна како гостин го совлада Фени индустри. Слободен беше Вардар.