УЕФА реши: Ц. Звезда нема да гостува во Ерменија, дали тоа ќе важи и за Македонија!

29 септември 2020 - 16:45

Фудбалерите на Црвена звезда натпреварот од плејоф-фазата од квалификациите за Лига Европа против Арарат, нема да го одиграат во Ерменија, како што беше предвидено од ждрепката, туку в четврток силите ќе ги одмерат на неутрален терен во Никозија (Кипар).

Челниците на УЕФА во последен момент процениле дека во моментов не постојат услови за играње во оваа држава поради војната која се води со Азербејџан за регионот Нагорно Карабах.

Останува да се види дали ваков ќе биде ставот на предводниците на европскиот фудбал и во иднина, нормално ако се пролонгираат воените дејствија во оваа земја, со оглед што Македонија треба да гостува во Еревен кон средината на ноември, во меч од годишното издание на Лигата на нации.