Блажевски: Само да не примиме први гол, како во Норвешка!
Веруваат дека можат, дека овој противник е достижен, а таквиот став го потпираат на натпреварот од Трондхајм. Загубија, но покажаа живост во играта, па сега треба барем да го повторат таквото издание.
„Јас мислам дека можеме и ќе се обидеме да освоиме еден или три бода, да не останеме на нула. Мислам дека имаме големи шанси да го оствариме тоа, бидејќи таму загубивме со 3-1, но одигравме одлично, имавме шанси за гол и на 0-0. Мислам дека ако постигневме гол први таму ќе остваревме подобар резултат. Во секој случај, таму се прикажавме во добро светло и мислам дека дома ќе ги освоиме првите бодови“, вели Дејан Блажевски, човекот кој постигна прекрасен гол на последниот европски меч, во Санкт Петербург кај Зенит.
Но, кој е рецептот? Вардар може да одигра офанзивно, но истовремено мора да го чува својот гол. Досега прв примаше голови и никогаш не успеа да се врати од негатива.
„Секако дека ние нема да се залетаме отпочеток и да тргнеме многу офанзивно, бидејќи ако примиме гол, знаеме дека потоа ќе биде многу тешко. Розенборг е квалитетна екипа. Како ќе поминува времето мислам дека ќе играме поофанзивно и ќе напаѓаме повеќе, но сѐБ зависи од моменталниот резултат. Може да играме и поповлечено, па повторно да примиме гол. Ќе покаже самиот натпревар“, размислува Блажевски.
Фудбалерите во црвено-црно не се во најдобро расположение откако во неделата загубија од Шкупи со 0-2 во домашното првенство, но треба да покажат и ментална способност, за да успеат тој кикс да го потиснат пред важен европски меч. Се игра в четврток, во 21.05 часот, на „Филип Втори“. Вардар досега одигра пет меча и петпати загуби, со гол-разлика 2-19.