Мирко Ивановски се враќа во Полска: Во преговори сум со Арка Гдиња!
Договорот на Ивановски со Славен му заврши и тој е слободен играч, а во последно време неговото име се поврзуваше со трансфер во италијанска Џенова, хрватските Динамо и Риека, но се поизвесно е дека македонскиот голгетер ќе се врати во Полска и тоа во својот поранешен клуб – Арка Гдиња.
Информацијата дека Арка го посакува Ивановски прво ја објавил еден навивачки сајт на овој полски клуб, а потоа полските новинари успеале да стигнат до македонскиот репрезентативец кој и им ја потврдил заинтересираноста од својот бивш клуб.
Ивановски за полските медиуми веќе признал дека преговара со Арка и дека се надева на позитивен исход и враќање во својот поранешен клуб, каде играше во периодот од 2010 до 2012 година и даде осум гола со две асистенции за 47 меча во дресот на овој клуб.
„Вистина е дека Арка е заинтерсирана за мене. Моментно преговарам со овој клуб“, признал Ивановски. „Како ќе заврши? Јас се надевам добро. Би било прекрасно да се вратам во Гдиња и да играм за Арка. Се надевам дека ќе се случи. Би сакал да е тоа што е можно поскоро“, додал Ивановски.
Битолчанецот, кој фудбалската кариера ја почна во Пелистер од 2008 до 20100 година беше дел од Македонија ЃП, а потоа играше во Славија Прага (10 меча – 3 гола), Арка, Астра Џурџу (45 меча – 11 гола), Клуж (14 меча – 2 гола), Видеотон (16 меча – 2 гола), Болуспор (10 меча) и последниве две годиниво Славен Белупо (63 меча – 25 гола). За најсилната македонска репрезентација настапи на 27 меча и даде еден гол.
Најпознатиот хрватски спортски весник „Спортске Новости“ го избра Ивановски во идеалниот тим на првата хрватска лига за изминатава сезона.