Манџукиќ: Ние сме лавови! Не сме свесни што направивме...

11 јули 2018 - 23:41

Херојот на Хрватска се вика Марио Манџукиќ. Напаѓачот кој водеше голема борба со англиските дефанзивци, кој ниту во еден момент не се штедеше, успеа еднаш да им избега и десет минути пред крајот на продолженијата, постигна гол – злато вреден.

Манџукиќ со солзи радосници го дочека крајот, а како што призна по мечот, никој не е свесен во моментов што направиле... Каков успех направи генерацијата со Златко Далиќ на клупата.

„Неверојатно! Не сме свесни што направивме. Ова е чудо. Ова го можат само големи екипи. Да се биде така храбар... Да се вратите и да одиграте ваков турнир со срце. Мислам дека во Хрватска е фешта, но и во други земји. Ќе повторам не сме свесни што направивме“, рече Манџукиќ.

Гол на кариерата? Јас само сум задоволен од своите мечеви и давам сè за екипата. За мене тимот е најбитен. Франција? На нас најголем притисок ни беа Данска и Русија, ова другово е.... Уживаме и играме фудбал. Губевме, ама се вративме. Бевме како лавови“, додаде Манџукиќ.