Изненадување во МЛС: Од седмата позиција до пласман во големото финале (ВИДЕО)

01 декември 2024 - 09:46

Српскиот фудбалер, Дејан Јовељиќ, е херојот на финалето на Западната конференција на МЛС, откако постигна единствен гол во 85. минута за победата на ЛА Галакси против Сиетл Саундерс.

ЛА Галакси ќе се бори за својата шеста титула во МЛС и тоа против Њујорк Ред Булс, кој до своето второ финале во историјата дојде со победа против Орландо Сити (1-0). Финалето ќе се одигра на 7 декември, а ЛА Галакси ќе има предност на домашен терен. Јовељиќ го донесе триумфот на ЛА Галакси на Западната конференција, додека Њујорк до победа го водеше Андрес Рејес, кој постигна гол со глава во 47. минута против Орландо. Ова ќе биде второ финале за Њујорк, кој претходно во 2008 година беше поразен од Колумбус Кру (3-1).

Успехот на Њујорк е изненадување, бидејќи тимот ја заврши регуларната сезона на седмото место на Источната конференција. Од друга страна, ЛА Галакси има богата историја, со пет освоени титули во 2002, 2005, 2011, 2012 и 2014 година.