Украина покажа дека е ептен незгодна – Холандија се извади за победа пред крајот (ВИДЕО)

13 јуни 2021 - 22:59

Дензел Дамфрис ја извади Холандија за стартна победа на Европското првенство во нашата група Ц, откако на пет минути пред крајот даде гол за триумф со 3-2 против Украина, која е втор наш противник во групата во четврток од 15 часот во Букурешт.

Холандија победи за први три бода, откако денеска Македонија загуби од Австрија со 1-3, а сѐ изгледаше на лесен триумф на „лалињата“ откако за седум минути во вториот дел од 52-та до 59-та минута, Џиорџино Вајналдум и Воут Вегхорст погодија двапати, но Украинците не се предадоа, па успеаа и да израмнат.

Пет минути ги делеа од бод од Амстердам кога за четириминутен блиц Јармоленко со прекрасен еврогол и Јаремчук погодија за израмнување, но дефанзивата не издржа во финишот и Думфрис со глава го реши прашањето за победникот.

После оваа победа Австрија и Холандија имаат по три бода и во четврток играат меѓусебен меч, а Македонија и Украина се без бод по првото коло, пред меѓусебниот меч за четири дена во Букурешт, а нашата селекција ја чека и тоа како тешка задача за бодови, зашто Укринците покажаа дека воопшто не се наивни.