Пандев испратен во пензија со стоечки аплауз од цела Амстердам Арена (ФОТО+ВИДЕО)

21 јуни 2021 - 19:35

Капитенот на македонската фудбалска репрезентација ја заврши репрезентативната кариера откако после 65 минути игра беше изваден од игра при негатива на Македонија со 0-3, па цела Амстердам Арена со стоечки овации и аплауз го испратија македонскиот ас во пензија.

За Пандев ова беше последен меч за Македонија, па холандската публика со аплауз го испрати во пензија, а македонските навивачи со скандирање на неговото име му се заблагодарија за сѐ што направи за македонскиот фудбал и националниот тим, посебно за ова деби и историски настап на Европското првенство.

Сите фудбалери со шпалир на замената, го испратија Пандев од теренот, а на трибините е и неговиот поранешен соиграч од Интер, Весли Снијдер, кој исто така со аплауз го испрати капитенот во пензија.