Неверојатните рекорди кои Сити и Гвардиола можат сезонава да ги урнат

Свој печат на неверојатната полусезона „граѓаните“ ставија со газењето врз Тотнем во саботата со 4-1.

Кога Сане од почетокот на натпреварот со Тотнем почна со голема леснотија да ги претрчува противничките фудбалери јасно беше дека тимот од Лондон лошо ќе си помине на ова гостување. 

Тимот на Гвардиола досега оствари 16 победи, а единствениот тим кој успеал да му скрати некој бод беше Евертон. Сити така е на добар пат да го собори и рекордот по бројот на победи во една сезона, кој лани го постави Челси кога тимот на Антонио Конте имаше неверојатни 30 победи во цела сезона.

За да го срушат тој рекорд, фудбалерите на Сити треба да победат на уште 14 натпревари од 20 до крајот. Цела втора полусезона е пред нив и имаат навистина добра шанса.

И самиот Конте неодамна кажа дека титулата во овој момент е нешто незамисливо, бидејќи Сити има 14 бода предност во однос на најблиските конкуренти, Челси и Јунајтед. Освен тоа, имаат и гол разлика од +44, што е како Челси и Манчестер јунајтед заедно.

Уште еден рекорд кој е на дофат до сините од Манчестер е рекордот на Жозе Мурињо од сезоната 2004/2005. Мурињо тогаш доминантно ја освои титулата со Челси со 95 освоени бода. Гвардиола досега собра 52 на првите 18 натпревари. Сити по бројот на освоени бодови пред Божиќ се изедначи со оној Манчестер на Сер Алекс Фергусон од 1993 година, и тоа со три натпревари помалку одиграни.

Венгер и генерацијата „непобедливи“ од 2003/2004? Можеби и тој рекорд ќе падне, којзнае...