Несторовски: Ако Палермо ми понуди нов договор – веднаш ќе го потпишам!

21 април 2019 - 08:30

Македонскиот репрезентативен напаѓач Илија Несторовски не сака да си замине од Палермо, па за италијанските медиуми призна дека ако добие нов договор од актуелниот клуб веднаш ќе прифати и ќе остане да биде капитен и лидер на тимот.

Несторовски ја игра третата сезона во Палермо, една во Серија А и две во Серија Б, а сега со сицилијанскиот тим се бори за враќање во калчолигашката елита. Сезонава даде 12 гола на 22 меча, пропушти два месеци поради повреда...

„Ако Палермо ми понуди нов договор – ќе останам!“, кратко и јасно одговорил Несторовски на прашањето за иднината и дали планира да замине во некој друг европски тим.

Во изминатите повеќе од година ипол честопати популарниот „Несто-гол“ се поврзуваше со трансфер во европски, но и италијански клубови, но на крајот остануваше на Сицилија.

„Јас ги читам сите вести и тоа се само зборови, зборови, зборови... Еднаш ја загубив и капитенската лента, зашто сите мислеа дека ќе бидам продаден. Сè беше шпекулација“, додава Несторовски.

Додава и дека ентузијазмот и понатаму е негова главна одлика и дека со Палермо атакува на остварување на целта – да игра пак во Серија А.

„Го имам истиот ентузијазам, истите идеи, има заедничка почит во соблекувалната, искреност... Дури и се смеам кога ќе загубиме, за да ни падне моралот. Бројките не ме интересираат, целта е да играме во Серија А, а ако не успееме ќе бидам многу – несреќен“, додава Несторовски.