Нејмар има начелен договор со Реал Мадрид за 2019 година

12 септември 2018 - 20:08

Шпекулациите за трансфер на Нејмар во редовите на Реал Мадрид изминатото лето запреа во моментот кога шпанскиот клуб објави официјално соопштение дека Бразилецот не е нивна трансфер-цел.

Денеска францускиот поратал „Ле10Спорт“ почна нова рунда шпекулации, откако објави дека Нејмар и Реал Мадрид имаат начелен договор за трансфер во летото 2019 година.

Наводно, таткото на Нејмар изминатиов период бил во постојана комуникација со Флорентино Перез, првиот човек на „кралскиот клуб“ и веќе ги договориле деталите за неговиот договор. Реал Мадрид нема проблем да го направи Бразилецот најплатен фудбалер во светот, но сега останува потешкиот дел - да се убеди ПСЖ да го продаде фудбалерот.

Не е преголема тајна дека Нејмар не е пресреќен во Париз. Тој и натаму сака да се врати во Шпанија каде играше во врвна форма во дресот на Барселона, а стилот на игра во Ла Лига исто така му беше многу подопадлив.

Останува да видиме дали Нејмар навистина во 2019 ќе го облече дресот на Реал Мадрид.