Навивачите на Шалке бараат клубот да го откупи Чурлинов од Штутгарт!

Чурлинов (21) сезонава има 20 настапи за Шалке и вкупно 1,104 минути во кои даде два гола и запиша четири асистенции, но не е стандарден првотимец, ама поради големата енергија многу брзо го засакаа навивачите, инаку браќа со вардаровите Комити, па сега од управата бараат како знаат и умеат да се обидат да го задржат офанзивното крило.

„Задржете го Дарко, неговата посветеност и енергија да се бори за секоја топка, посебно приврзаноста со навивачите, покажува дека е сто отсто Шалке. Јас се надевам дека ќе го задржите“, вели еден од приврзаниците на клубот од Гелзенкирхен.

„Како знаете, задржете го Чурлинов. Досега не сме виделе таква посветеност и такви чувства кон клубот од фудбалер кој е на заем“, додава друг навивач.

Чурлинов во Шакле дојде од Штутгарт, но „швабите“ уште зимоска објавија дека немаат намреа да се откажат од македонското крило и дека ќе го вратат назад после завршување на сезоната. Но, ситуацијата сега е поинаква и шансите Чурлинов да остане во Шалке се поголеми, од причина што Штутгарт може и да испадне од Бундеслигата, а Шалке е на чекор до промоција во германската елита.

Штутгарт моментно со 29 бода е трет одзади и во позиција за бараж, ама само два бода пред Арминија Билефелд на две кола до крајот на сезоната. Шалке, пак, е прв во Цвајта со 59 бода, два пред Дармштад и Вердер Бремен на две кола до крајот.