Милан се спаси од пораз од Удинезе со пенал во 95.минута (ВИДЕО)

03 март 2021 - 22:48

Милан во минатото коло успеа да ја совлада Рома на „Олимпико“, но денеска ја продолжи очајната форма со реми против Удинезе од 1-1 во рамки на 25.коло во Серија А. 

Миланезите повеќе не се тимот кој половина сезона беше лидер во калчото, а тоа го покажаа и вечерва, а се спасија од пораз во судиското продолжение. „Бункерот“ на гостите беше ефикасен, а водство за гостите донесе Родриго Бекао во 68-та минута кога погоди по еден корнер на Родриго де Паул, но на голот му кумуваше и Џанлуиџи Донарума. 

Домашниот тим се спаси буквално во 95.минута, кога Стригер Ларсен неверојатно играше со рака во својот шеснаесетник, а Франк Кеси реализираше од белата точка. За тимот од „Сан Сиро“ тоа беше 16-ти пенал сезонава. 

Македонскиот репрезентативец Илија Несторовски го одигра цел меч за гостите. 

Горан Пандев влезе во второто полувреме на градското дерби помеѓу Џенова и Сампдорија што заврши без победник 1-1.

НА ОСТАНАТИТЕ НАТПРЕВАРИ
Аталанта - Кротоне 5-1
Беневенто - Верона 0-3
Калјари - Болоња 1-0
Фиорентина - Рома 1-2