Мануел Пелегрини официјално се врати во Ла Лига (ФОТО)

09 јули 2020 - 13:58

Чилеанскиот тренер Мануел Пелегрини после седум години се враќа во шпанската Ла Лига, откако денеска Бетис го промовираше за свој нов кормилар, потпишувајќи договор до 2023 година.

Пелегрини е бивш тренер на Реал Мадрид, Вилјареа, Малага, Манчестер сити, а во Бетис доаѓа за да го крене тимот, кој сезонава имаше очајни моменти, па во еден период беше и многу близу до зоната за испаѓање.

Последен клуб на Пелегрини му беше лондонски Вест Хем. Чилеанецот во изминатиов период се поврзуваше со турски Фенербахче, но понудата од Шпанија беше попримамлива и после лошата сезона на Бетис и актуелното 13-то место, за следната сезона Пелегрини ќе има цел да го врати овој андалузиски тим во Европа.

Пелегрини дојде во Европа од Ривер плејт во 2003 година кога го презема Вилјареал и го водеше пет години со многу успеси по што му обезбедија преселба во Реал Мадрид, но издржа само една сезона, а потоа Малага имаше импресивни три години пред да се пресели во Манчестер сити од 2013 до 2016. Хабеи и Вест Хем му беа последните дестинации во овие три години, па сега по седум години пауза се враќа во Ла Лига.