Интер слави сред Рим: Прв пласман во ЛШ по шест години (ВИДЕО)
„Нераѕурите“ славеа на сензационален начин со 3-2 на „Олимпико“ благодарение на пресвртот во финишот од натпреварот. Лацио поведе со 1-0 по несреќниот автогол на Иван Перишиќ уште во деветата минута. Деамброзио израмни за гостите на 1-1 по половина час игра, но во финишот на првото полувреме Фелипе Андерсон ги врати домашните во водство од 2-1.
Драмата и пресвртот започнаа во 78-та минута, кога Стефан де Фрај направи пенал врз Мауро Икарди. Аргентинецот беше прецизен од белата точка за својот 29-ти првенствен гол. Само минута подоцна капитенот на Лацио, Сенад Лулиќ го остави тимот на цедило, кога без потреба стартуваше опасно и судијата Џанлука Роки му покажа втор жолт картон. Веќе во 81-та минута Интер направи пресврт со голот на Матијас Весино.
Интер се враќа во Лигата на шампиони по сезоната 2011/2012. Со овој пораз, Лацио финишира на петтото место на табелата и ќе игра во Лигата на Европа следната сезона.