Силекс се засили и со Хрват во нападот

30 јануари 2023 - 17:47

Поранешниот македонски првак Силекс донесе уште еден интернационалец во своите редови, овојпат од Хрватска, откако денеска го промовираше офанзивецот Томислав Турчин, чиј последен клуб му беше Сесвете.

Турчин (25) е поранешен младински репрезентативец на Хрватска, роден во Винковци, кој преку Цибалија бил дел и од Риека, а играл и за Вараждин, Б-тимот на Динамо Загреб, Хрватски Драговољац, а има и интернационално искуство како член на босански Широки бријег и на словенечки Алуминиј.

Станува збор за офанзивец, кој игра на десната крилна позиција, иако може да игра и како втор напаѓач, па и на спротивната странична позиција како лево крило.

Кратовци сезонава веќе ги ангажираа повратникот и српски интернационалец од средниот ред Стефан Милосављевиќ, доскорешниот вардаров дефанзивец Никола Ристески, црногорскиот интернационалец Халил Мухаремовиќ, младинскиот македонски репрезентативен центарфор Марко Ѓоршиевски, како и Хамза Рамани.