ФИФА го продолжува правилото: Македонската Прва лига во новата сезона со – пет замени?
ФИФА го смени правилото за да се помогне во фудбалската игра пред сè на фудбалерите, па сите национални лиги кои го доигруваа првенството го користат правилото поради згуснатиот календар и напорот со кој се соочуваат фудбалерите, а истото ќе се користи и идниот месец во завршницата на Лигата на шампионите и Лига Европа.
Но, самиот факт дека одморот на фудбалерите ќе биде прекраток, а новата сезона уште повеќе ќе биде згусната зашто ќе стартува од средината на септември, ЛШ и Лига Европа од 20 октомври, а есенва и репрезентациите ќе се вратат во погон со седум до осум мечеви во три месеци, значи дека календарот останува пренабиен. Токму поради ова, според најавите од европските медиуми, Бордот на ФИФА во следните денови се очекува да донесе очекувана одлука, примената на правилото за пет замени да остане на сила и за следната сезона.
Веројатно препораката на ФИФА ќе биде да се користи правилото за да не се доведат фудбалерите во дополнителен ризик од пренатрупаниот календар, за почесто да се повредуваат. Но, како сето тоа ќе изгледа останува да се види. Сепак, ФФМ ќе треба својот правилник за натпреварување да го промени, ако се воведе ова и на клубовите да им овозможи еден поинаков тек на мечевите, за што тренерите би добиле дополнителна шанса во тек на мечот да „интервенираат“ со свеж фудбалер.