Два од два за Вардар: Аврамовски ја сруши неосвоивата тврдина во Велес (ФОТО)
Најдобриот стрелец и играч на Вардар, Даниел Аврамовски го реши мечот во 33-та минута, по одличната акција на Али Адем и прекраната топка за Матеј Цветановски, чиј удар беше изблокиран на два метри пред гол, линијата, па репрезентативецот Аврамовски од втора погоди за негов 11-ти гол сезонава. Со победата Вардар повторно на 24 часа избега на 11 бода во однос на Шкендија.
Црвено-црните сосема заслужено триумфираа денеска против Борец, беа подобар тим, искористија една можност, иако прашањето за победникот можеа да го решат и порано, а и мечот да излезе полесен од очекувањата, но на скопјани во десетината одлични можности им фалеше завршно додавање за да стигнат до повеќе голови. Аврамовски во завршницата имаше и зицер за втор гол, но ударот заврши сантиметри крај дирекот.
Борец првпат загуби во Велес по 18 октомври 2017 година, кога Пелистер во меч од Купот (3-1) славеше триумф и оттогаш, велешани не знаеа за пораз дома, прво во второлигашката конкуренција, а есенва и во прволигашкото друштво и сега Вардар ја освои неосвоивата тврдина во Велес.
Утре на програмата се играат останатите четири меча, а се среќаваат Македонија ЃП – Академија Пандев (13 часот), Силекс – Шкендија, Ренова – Струга Трим Лум и Работнички – Шкупи (сите од 14 часот).