Дуели во Битола и Струмица за бегство од опасната зона

Први на терен излегуваат Пелистер и Македонија ЃП чиј дуел почнува во 12:30 часот. Двете екипи се со ист број бодови (14), но ѓорчепетровци се една позиција погоре (деветта) поради подобрата гол-разлика. Сепак, моменталната форма е далеку на страната на домаќинот на денешниот натпревар поради што Пелистер е и фаворит за бодовите.

По подолго време, битолчани врзаа две победи, против Брера и Шкупи на кои не примија гол и им избегаа на Работнички и Шкупи кои се заковани на последните две позиции. Од друга страна, Македонија ЃП веќе пет кола не знае за победа, претходните три меча ги загуби со вкупно 11 примени голови, а последниот триумф го забележа на 3 октомври против Арсими. Во меѓувреме си замина тренерот Бобан Грнчаров, но ситуацијата во клубот е далеку од идеална и веројатно сите со нетрпение ја очекуваат зимската пауза.

Половина час подоцна во Струмица, Брера го пречекува Тиквеш во дуеш директен дуел за опстанок. Домаќинот на овој меч е една позиција над опасната зона и со евентуален триумф денеска може да им избега на ривалите и најверојатно зимската пауза ќе ја дочека на седмата позиција. Сепак, струмичани имаат проблеми со резултатите, во последните четири кола осоија само еден бод, додека Тиквеш во истиот период оствари две победи и едно реми и избега од зоната за испаѓање.

Интересно е тоа што Брера нема победа против Тиквеш на претходните седум меѓусебни дуели во првенството и Купот на Македонија. Последниот триумф го оствари на 24 август 2023 година кога на домашен терен славеше со 2-0.