Репрезентативниот голман Шишковски ја има најдобрата одбрана на Кипар (ВИДЕО)

23 октомври 2020 - 17:02

Македонскиот репрезентативен голман Дамјан Шишковски ја има најдобрата одбрана на Кипар за седмото коло во кипарскиот шампионат, откако имаше фантастична интервенција против АЕК Ларнака на македонското трио Иван Тричковски-Стефан Спировски-Даниел Мојсов.

Одбраната на Шишковски е избрана за број еден, пред таа на доскорешниот вардаров голман и екс-репрезентативец Филип Гачевски во најсилната кипарска лига.

Шишковски летоска направи трансфер во Докса, откако претходно во два наврати бранеше за Работнички, а имаше излети и во Финска во досегашниот дел од кариерата.

Младиот голман од септември наваму запиша четири настапи за македонската репрезентација, бранејќи на мечевите со Ерменија (2-1), Грузија (1-1) и Естонија (3-3), а ги одигра и последните 20 минути од втората пресметка со Грузија (1-1) во Скопје, откако „единицата“ Столе Димитриевски на тој меч доби црвен картон.