Нов гол на Тричко за победа на АЕК Ларнака: Не игравме најдобро, ама битно победивме!

11 ноември 2018 - 19:11

Македонскиот репрезентативец Иван Тричковски ја игра сезоната на кариерата во АЕК Ларнака, откако денеска постигна нов гол во триумфот на кипарскиот тим на гостувањето кај Алки со 3-0 за петта сезонска победа во седмиот меч.

Тричковски погоди во 50-та минута, откако АЕК цело полувреме се мачеше за да го отвори мечот, па сега со два меча помалку од лидерот АЕЛ Лимасол, клубот на Тричковски и Даниел Мојсов е на шест бода позади како четвртопласиран во моментов.

„Не го одигравме добро овој меч. Не ни дозволија да играме, ова беше тврд меч, после тој дуел со Лудогорец. Како и да е, имавме шанси во првиот дел, но во вториот се потрудивме повеќе, направивме можности, дадовме голови и тоа што е најважно – ја остваривме целта и победивме. Има сега денови до дербито со АПОЕЛ, но ние сме подготвени да победиме“, вели Тричковски.

Македонскиот репрезентативец минатиот месец ги прескокна двата мечеви од Лига на нации, па сега ќе биде ударна игла особено што Езгјан Алиоски поради суспензија нема да може да игра на дуелот со Лихтенштајн, исто како и Елиф Елмас.