Надал не сака да оди на гости кај Федерер во Базел

Шпанскиот тенисер само два пати во кариерата има играно на овој турнир, каде што е домаќин Роџер Федерер. На својот „Фејсбук“ профил Надал објави дека е премногу уморен да игра во Базел, а под знак прашалник е и учеството на мастерсот во Париз.

„По две сјајни недели во Кина, каде го освоив трофејот во Пекинг, а во Шангај загубив во финалето, време е за малку одмор. Сакам да им упатам специјална порака на моите бројни фанови во Швајцарија, кои секогаш ме подржувале, како и на натпреварите со Роџер“, напиша Рафа.

Интересно е тоа што Надал до крајот на сезоната може да го загуби првото место на АТП-листата од Роџер Федерер. Швајцарецот доколку го освои турнирот во Базел ќе има 1460 бодови помалку од Надал, а потоа ќе дојдат мастерсот во Париз и завршниот мастерс во Лондон. Тоа значи дека се во игра 2.500 поени, а Надал за да остане број 1 до крајот на сезоната ќе мора да освои минимум 1.050 бодови на овие два последни сезонски турнири.