За успехот на Ледецка биле заслужни скиите на Шифрин!

18 февруари 2018 - 14:27

Олимпијката од Чешка, Естер Ледецка направи сензација на Зимските олимписки игри (ЗОИ) во Пјонгчанг благодарение на скиите, кои претходно ги користеше најдобрата скијачка Микаела Шифрин, а тоа го потврди тренерот на новата олимписка шампионка во супер-велеслалом.

Банк откри дека Ледецка во последната година ипол ги користела старите скии на американската скијачка, а дека тие се покажале како најбрз пар пред саботната трка.

„Имавме нови скии, како и некои веќе користени. Тоа беа скиите на Микаела Шифрин. Нашиот сервисер ги подготвуваше многу пати. Скијавме со нив и ги тестиравме. Се покажаа дека се најбрзи и затоа ги одбравме нив“, изјави Банк.

Ледецка во саботата и ја донесе првата медала на Чешка на ЗОИ во алпско скијање. 22-годишната олимпијка ја очекуваат и натпреварувањата во сноуборд во Пјонгчанг, а на дуелите во паралелен велеслалом, во кој е светска шампионка, на програмата се наредната сабота.

Инаку Шифрин освои злато во велеслалом во Пјонгчанг, а не успеа да ја одбрани титулата во слалом. До крајот на ЗОИ ја очекува трката во комбинација.