МТВ ги откупи правата за ЗОИ 2018 во Пјонгчанг и за ЛОИ 2020 во Токио!

И покрај тоа што пред дваесетина дена како бомба одекна веста дека нема д аможе да се гледаат ЗОИ 2018 на Македонската Радио Телевизија, сепак оттаму информираат дека на нејзините програми ексклузивно ќе се емитува настаните од Игрите во Пјонгчанг, кои ќе се одржат од 9 до 25 февруари оваа година.

„По долги и исцрпувачки преговори со Дискавери, официјалниот носител на правата за Олимписките игри на територијата на Европа во периодот 2018-2024, Јавниот сервис успешно ја круниса важната мисија - да ја продолжи полувековната традиција, според којашто спектакуларните манифестации се меѓу главните препознатливи белези на неговата богата спортска програма“, пишува во соопштението од МТВ.

Договорот со кој МРТ обезбеди дека ќе ги пренесува и Олимписките Летни игри во Токио во 2020 година, е склучен на само три дена пред почетокот на Игрите во Пјонгчанг, пред сѐ поради цената на телевизиските права, која била далеку повисока во однос на цената од претходните Игри.

Од 9 до 25 февруари, на МТВ-1 и на МТВ-2, гледачите ќе можат да уживаат во околу 150 часа премиерна програма од најатрактивните случувања на снежните терени во Пјонгчанг.

Во периодот од 2 часот изутрина до 15.30 часот попладне, директни преноси ќе одат од натпреварите во алпско скијање, хокеј на мраз, уметничко лизгање, скијачки скокови, бијатлон и во нордиско скијање. Поради временската разлика со Кореја од осум часа, дел од возбудувањата во боб, санкање, брзо лизгање, акробатско скијање и во сноуборд ќе бидат емитувани одложно во попладневните и во вечерните часови, па заедно со репризите, Јавниот сервис ќе понуди повеќе од 200 часа ексклузивнa олимпискa содржинa.

„Олимписките Зимски игри во Пјонгчанг ќе бидат вистински програмски темел во текот на шеснаесетте дена, но МРТ нема да ги заборави ниту вообичаените спортски настани. Во редовните термини ќе бидат емитувани и преносите од фудбалската Лига на шампионите и од Лига Европа, од ракометната Лига на шампионите во двете конкуренции, од ракометната СЕХА лига, како и од завршниот турнир на кошаркарскиот Куп на Македонија“, пишува меѓудругото во соопштението.